Urimi i Rabinit të Shqipërisë, Yisroel Finman: Gëzuar Festën e Hanukah!

Festa e Hanukah nisi sot dhe përfundon në mbrëmjen e së hënës, më 10 dhjetor.

Rabini i Shqipërisë, Yisroel Finman, uroi të gjithë shqiptarët me rastin e Festës së Hanukah, duke ndezur nga Tirana qiririn e parë.

“Gëzuar festën e Hanukah. Nata e Parë”, shkruan rabini Finman në faqen e tij në Facebook.

Këtë vit Festa e Hanukah nisi mbrëmjen e së dielës së 2 dhjetorit 2018 dhe përfundon në mbrëmjen e së hënës, më 10 dhjetor.

Sipas kalendarit Hebraik, ajo fillon ditën e 25-të të muajit Kislev.

Hanukah, apo siç njihet ndryshe “Festa e Dritave” (ose “Festivali i Dritave), zgjat për tetë ditë e netë.

Një Shandan (Hanukia) unik me 9 krahë për qirinj, përdoret për këtë festë.

Ndezja e qirinjve është akti kryesor gjatë Hanukasë. Qiriu i mesit shërben si qiri ndezës për të tjerët dhe qiriu i parë në të djathtë është qiriu që ndizet në ditën e parë dhe çdo ditë shtojmë nga një qiri të ndezur.

Në këtë mënyrë në ditën e tetë do të kemi të nëntë qirinjtë e ndezur që simbolizojnë djegien e lëndës djegëse pas fitores së Makabenjve.

Hanukah është një festë që simbolizon fitoren e Makabenjve mbi ushtrinë greke-siriane të udhëhequr nga Antioku, si dedikim ndaj Tempullit të Dytë që u përdhos gjatë pushtimit greko–sirian.

Festa e Hanukah është organizuar rregullisht vitet e fundit në Shqipëri dhe Kosovë.

Dy presidentët e fundit të Shqipërisë, Bujar Nishani dhe Ilir Meta, kanë organizuar pritje zyrtare për të nderuar festën e Hanukasë në Presidencë, ku kanë qenë të pranishëm edhe ambasadorët e radhës të Izrelit në Shqipëri, David Cohen dhe Boaz Rodkin, diplomatë dhe politikanë të ndryshëm.

Qytetarë të shumtë shqiptarë kanë ndezur qirinjtë, si familjet Pirra dhe Malka.

Shqiptarët e Izraelit festojnë Pavarësinë: shqiponjë dhe flamur kuqezi

Komuniteti shqiptaro-hebre që jeton në Izrael festoi Festën e Pavarësisë. Mori pjesë ambasadori Bardhyl Canaj