Efraim Inbar, profesor i shkencave politike në universitetin izraelit të Bar-Ilan, drejtues i qendrës për studime strategjike Begin-Sadat, gjatë një interviste për emisionin “Diplomaticus” të gazetarit Erion Kaçorri në News24 shpreh opinionin e tij në lidhje me çështjen më të nxehtë të momentit, atë të terrorizmit dhe ekstremizmit.

Ai deklaron se grupe si ISIS apo Al Kaeda kanë një motivim ideologjik. Sipas tij ata i përmbahen një versioni shumë të dhunshëm të islamit dhe veprojnë në përputhje me këtë ideologji.

“Dua ta bëj shumë të qartë se terrorizmi nuk është rezultat i varfërisë. Nuk ka një lidhje mes terrorizmit dhe varfërisë. Bin Laden ishte milioner përpara se të themelonte Al Kaeden. Nuk ka një lidhje mes mungesës së shkollimit dhe terrorizmit. Liderët e Hamasit, grupit radikal sunit në Gaza, janë mjekë, avokatë, janë të arsimuar mjaft mirë. Pra është e gjitha ideologjike” deklaron Inbar.

Efraim Inbar shikon Iranin më të rrezikshëm sesa ISIS.

“Irani mund të bëhet fuqi bërthamore në të ardhmen e afërt, ndërsa ISIS është shumë larg nga kjo mundësi. Duhet ta kuptojmë se terroristët janë të dobët, terrorizmi është një armë e të dobëtit. Shtetet janë shumë më të rrezikshme sepse shtetet kanë avionë, shtetet kanë sisteme raketore dhe shtetet mund të bëhen fuqi bërthamore”, deklaron profesori Izraelit Efraim Inbar per televizionin News 24.

I pyetur sesi është pritur ne Izrael lajmi se mund te kishte një sulm terrorist ndaj ekipit izraelit te futbollit teksa luante ne Shqipëri, Inbar deklaron se për izraelitet nuk është diçka e re.

“Mendoj se nuk është ndonjë çudi për Izraelitët pasi ata kanë qenë shënjestër e grupeve terroriste jashtë vendit. Kemi parë në të kaluarën terroristë nga Hezbollah dhe grupe të tjera palestineze duke u përpjekur të dëmtojnë izraelitët që udhëtojnë jashtë vendit, në Europë dhe gjetkë. Në Indi për shembull. Kështu që u kuptua si një tjetër përpjekje armiqësore arabe kundër izraelitëve” thekson profesori Izraelit Inbar në News24.