Netanyahu takohet me Putin në Paris: Sqaruam gjithçka
Kryeministri i Izraelit dhe Presidenti rus zhvilluan një bisedë të improvizuar në Pallatin Elysee
Kryeministri i Izraelit, Benjamin Netanjahu dhe Presidenti rus Vladimir Putin zhvilluan një bisedë të improvizuar të dielën në Paris, e tyre e parë që nga rrëzimi i aeroplanit rus në Siri më 17 shtator.
Moska thotë se veprimet izraelite çuan në rrëzimin e avionit nga sistemi antiraketor i Sirisë.
Një takim formal i planifikuar fillimisht midis dy njerëzve në Paris u anulua.
Por të dy udhëheqësit arritën të flasin në periferi të një ngjarjeje në Pallatin Elysee në Paris.
Netanjahu u tha gazetarëve se “biseda ishte shumë e mirë dhe deri në atë pikë, unë do të thosha shumë e rëndësishme”.
Ai nuk pranoi të shtjellonte më tej bisedën. Netanjahu gjithashtu mbajti biseda të shkurtra me Presidentin e SHBA Donald Trump dhe kancelaren gjermane Angela Merkel.
Kryeministri i Izraelit, Benjamin Netanyahu, ishte midis 70 liderëve nga e gjithë bota në kryeqytetin francez
“Jam krenar të përfaqësoj Izraelin në ngjarjen që përkujton 100 vjetorin e përfundimit të Luftës së Parë Botërore, në radhët e para me udhëheqësit botërorë. Ky është një moment i krenarisë së jashtëzakonshme për vendin tonë!”, kështu shkruan kryeministri Netanyahu në faqen e tij në Facebook, ku ka postuar edhe videomontazh nga takimet e tij.
Udhëheqësit botërorë u mblodhën në Paris, në përkujtimet që shënojnë 100-vjetorin që nga përfundimi i Luftës së Parë Botërore, në një kohë kur bota njeh rritje të nacionalizmit dhe tensioneve diplomatike.
Rreth 70 liderë, duke përfshirë presidentët e SHBA-ve dhe Rusisë, Donald Trump dhe Vladimir Putin, po marrin pjesë në njëqind vjetorin e armëpushimit të vitit 1918 në kryeqytetin francez.
Të pranishëm janë edhe presidenti i Shqipërisë dhe ai i Kosovës, Ilir Meta dhe Hashim Thaçi.
Gjatë ceremonisë, kryeministri izraelit dhe bashkëshortja e tij, Sara Netanyahu, patën shumë takime me liderë të ndryshëm botërorë, përfshirë dhe Presidentin e Shqipërisë, Ilir Meta.