Tirane, 11 mars 2013 – Diplomacia izraelite ka qenë tepër aktive në zhvillimin e shumë takimeve në sektorin e biznesit.

Ambasadori i Izraelit në vendin tonë, David Cohen, u takua me kreun e Dhomës së Tregtisë dhe Industrisë Tiranë, Nikolin Jaka për të ndarë planet konkrete që sipërmarrësit izraelitë kanë për vendin tonë.

Shefi i diplomacisë së këtij vendi u shpreh se “nevoja për të qenë këtu ishte e madhe, pasi u panë mundësitë konkrete të bashkëpunimit”.

Tashmë 40 kompani izraelite bashkëpunojnë me kompanitë shqiptare në një marrëdhënie partnershipi të ndërsjellë.

Mes dy vendeve janë nënshkruara 9 marrëveshje tregtare. Ambasadori zhvilloi takime me disa krerë shoqatash biznesi, si “Biznes Albania”, Agrobiznesin etj.

Zoti Jaka u shpreh gjatë takimit se është momenti i konkludimit të mundësive reale për të bashkëpunuar mes dy vendeve tona. Tashmë sipas zotit Jaka ka ardhur momenti të identifikojmë interesat e përbashkëta që kanë sipërmarrjet tona e ku njëkohësisht investitorët izrealitë janë të mirëpritur të vijnë në Shqipëri.

“Është një moment i shfrytëzimit impaktit që japin reforma fiskale dhe rregullatore të ndërmarra së fundi, e ky mund të jetë një hap i mirë i tërheqjes së investitorëve izrealitë në vendin tonë”, u shpreh ai.

Gjatë bisedës mes dy drejtuesve doli qartë fakti se është i nevojshëm intensifikimi i marrëdhënieve tregtare, pasi tashmë 40 kompani izrealite bashkëpunojnë me kompanitë shqiptare në një marrëdhënie partnershipi të ndërsjellë. Mes dy vendeve tona ka të nënshkruara 9 marrëveshje tregtare dhe gjatë këtij viti po punohet për nënshkrimin e tre marrëveshjeve të tjera.

Zoti Jaka cilësoi në këtë konteskt, se nënshkrimi i marrëveshjes për heqjen e taksimit të dyfishtë do të jetë dhe pika kryesore ku do të negociojnë palët, në mënyrë që të arrihet sa më shpejt, për të hequr barrierat e panevojshme.

Po kështu një pikë e rëndësishme e bisedës ishte hapja e Dhomës së Tregtisë dhe Industrisë Shqipëri-Izrael në vendin tonë, ku përfaqësues i saj do të jetë një investues shqiptar që e ka të shtrirë aktivitetin e tij jo vetëm në vendin tonë, por dhe në Izrael, zoti Ilir Kokeri. Po kështu ambasada e Izraelit në Shqipëri po punon me ministritë e linjës shqiptare për të siguruar tërheqje të punëtorëve shqiptarë në Izrael, kryesisht në fushën e ndërtimit.

Në këto kushte u dol në konkluzionin se është i nevojshëm intensifikimi i marrëdhënieve mes palëve në kordinimin sa më të saktë në informacionet mes palëve e për të qenë sa më efikas në punën e përbashkët në shërbim të rritjes së shkëmbimeve tregtare mes dy vendeve tona.