Shqipëria merr pjesë në kongresin e sindikatave izraelite

Gëzim Kalaja dhe Arjola Alika të pranishme në Kongresin e 8-të të Bashkimit Izraelit të Punonjësve Shtetërorë

Shqipëria mori pjesë për herë të parë në Kongresin e 8-të të Bashkimit Izraelit të Punonjësve Shtetërorë (IUGE – Israeli Union), të zhvilluar në Rishon LeZion.

Sipas Ambasadës Shqiptare në Izrael, në kongres morën pjesë Gëzim Kalaja, president i Bashkimit të Sindikatave të Pavarura të Shqipërisë, dhe Arjola Alika, presidente e Bashkimit të Sindikatava të Pavarura të Punonjësve Publikë.

Në kongres morën pjesë drejtues sindikatash nga e gjithë bota, ndërsa diskutimet u fokusuan në të ardhmen e Shërbimit Civil.

Morën pjesë edhe ministri izraelit i Financave, Moshe Kahlon, komisionari i shërbimit civil, Daniel Friedman, si dhe përfaqësues nga trupi diplomatik i akredituar në Izrael, përfshirë ambasadorin e Shqipërisë, Bardhyl Canaj.

“U zhvilluan bisedime për një mundësinë e marrëveshjeve të bashkëpunimit midis IUGE dhe Bashkimit të Sindikatave Shqiptare”, thuhet në njoftimin e ambasadës.