Dy amerikano-hebrenjtë Benjamin (Benjy) Neumann dhe bashkëshorten e tij, Ellie, folën me superlativa për kontributin e producentit dhe fotografit amerikano-hebre Norman Gershman, të ndarë nga jeta, më 10 qershor.

Norman Gershman është autor i dokumentarit “BESA – THE PROMISE”, përmes të cilit bota njohu kontributin e madh të shqiptarëve për shpëtimin e hebrenjve gjatë Holokaustit.

“Është një humbje e madhe për të gjithë, largimi nga jeta, më 10 qershor i Norman Gershman, autori i “Besa”. Midis kontributit të tij në botën tonë, Norman u tregua i aftë të shkëlqente duke ndriçuar aktet heroike të pabesueshme të popullit shqiptar gjatë Holokaustit. E gjithë familja Neuman ndihet në borxh përgjithmonë ndaj tij”, thanë Benjy dhe Ellie për “Izraeli Sot” gjatë një komunikimi nga Shtetet e Bashkuara.

Pak kohë më parë, Benjamin Neumann dhe Ellie, vizituan Shqipërinë, ku midis të tjerave i dhuruan Presidentit Meta, një kopje të autografuar të librit të tyre “Shpëtim në Shqipëri – Kujtimet e një vajze hebreje nga Hamburgu” dhe patën takime me personalitet të ndryshme të jetës politike dhe atë shoqërore në “Vendin e Shqiponjave”.

Benjamin Neuman është djali i Johanna Jutta Neumann, një hebreje të shpëtuar në Shqipëri gjatë Luftës së Dytë Botërore.

Johanna Jutta Neumann gjeti strehë në Shqipëri gjatë Luftës së Dytë Botërore, në Durrës, Berat, Lushnjë dhe në Tiranë.