Yossi Cohen, kreu i shërbimit inteligjent të Izraelit Mossad, po përfundon detajet e fundit për vizitën e tij të ardhshme në Shtetet e Bashkuara në muajin shkurt, njoftoi të premten Kanali 13 i Izraelit

Sipas raportit, Cohen do të takohet me Këshilltarin e Sigurisë Kombëtare të SHBA Jake Sullivan dhe kreun e CIA-s William Burns, me këtë të fundit ende për t’u konfirmuar nga Senati.

Një takim me Presidentin e SHBA Joe Biden është gjithashtu brenda sferës së mundësive – por është ende për t’u konfirmuar, pasi takimet e para ballë për ballë me udhëheqësit e SHBA janë një prerogativë e udhëheqësve të shtetit izraelit, shtoi raporti.

Sipas raporteve të mëparshme në mediat izraelite, turneu i Cohen në Uashington do të përqendrohet kryesisht në Iran – dhe gatishmërinë e SHBA për t’u bashkuar me marrëveshjen bërthamore të vitit 2015.

Cohen thuhet se do të përshkruajë kërkesat e Izraelit për çdo marrëveshje të re me Teheranin, i cili do të kërkojë të frenojë ambiciet e tij rajonale përtej aspiratave bërthamore.

Kërkesat thuhet se do të përfshijnë ndërprerjen e mbështetjes iraniane për grupet terroriste rajonale dhe tërheqjen ushtarake të Iranit nga Siria, Iraku dhe Jemeni.